Solicitude de colaboración na difusión da II Edición do Programa ARGOS

Ata o vindeiro 9 de xuño de 2014 está aberto o prazo de inscrición para participar na edición 2014 do programa ARGOS, unha iniciativa conxunta da Área de Valorización, Transferencia e Emprendemento (AVTE) da USC e da incubadora de empresas UNINOVA, que contan coa colaboración das Facultades de Ciencias Económicas e Empresariais de Santiago e a de Administración e Dirección de Empresas de Lugo.

Tomando coma eixos o “traballo en equipo” e o “aprender facendo” ao longo do programa acompáñase aos participantes no proceso de definición dunha idea de negocio, e avalíase a súa capacidade de chegar a un proxecto empresarial convincente.
As tres ideas clave do programa son:
 A complementariedade de perfís persoais e profesionais no equipo que incide na eficiencia e eficacia do traballo e, polo tanto, na posibilidade de obter mellores resultados.
 Que cada equipo sempre contará cunha persoa con coñecementos de xestión empresarial
 Porase a disposición dos participantes unha carteira de resultados de investigación da USC que poderá ser a base do seu plan de empresa.

O programa está dirixido a alumnos/as dos últimos anos de licenciatura ou grao; alumnos/as de posgrado, máster ou doutoramento; egresados das ultimas promocións e colaboradores ou persoal integrado en grupos de investigación e estrutúrase en tres fases:

Nunha primeira fase que se desenvolverá ao longo da primeira quincena de setembro, os inscritos poderán participar en varias sesións informativas e de adestramento para o traballo en equipo. Na segunda etapa do programa procederase á constitución dos equipos multidisciplinares con catro ou cinco integrantes.
Finalmente na terceira etapa, os equipos baixo a titorización de persoal asignado polo programa ARGOS desenvolverán o seu plan de empresa que deberán presentar ante un xurado ao final da fase. Como apoio complementario nesta fase realizaranse outras accións formativas e diferentes visitas a empresas que contribuirán á mellor do plan de empresa.

Ao final do programa, os plans entregados, poderán optar a algunha das dúas categorías de premios establecidas e dotadas con 3.000€ cada unha e 6 meses de acceso gratuíto a espazos de incubación:

• ARGOS SPIN a proxectos empresariais xurdidos a partir de algún dos resultados de investigación xerados na USC.
• ARGOS ENXEÑO a proxectos empresariais xurdidos de ideas de negocio aportadas polos participantes no programa.

Para inscribirse hai que cumprimentar o formulario que figura, xunto coas bases do programa, na web: www.uninova.org e envíalo ao correo electrónico argos@usc.es.

Para máis información tamén se pode contactar no correo argos@usc.es ou nos teléfonos: 881 815 593/ 881 815 595 /881 815 596

Máis información