| Resumen:
Entendemos por plasticidade cerebral o conxunto de mecanismos celulares e moleculares que permiten a adaptación do cerebro a cambios no noso entorno interno e externo.
Na idade adulta, os mecanismos de plasticidade son pouco coñecidos e teñen actividade limitada. Identificalos e deseñar estratexias para modulalos, permitiranos estirar a fiestra de oportunidade para o tratamento das alteracións do neurodesenvolvemento, promover a resiliencia do cerebro durante o avellantamento, identificar a etioloxía de enfermidades neurodexenerativas, e promover a recuperación tras lesións centrais e periféricas, entre outros.
No laboratorio “Brain Plasticity” do CIMUS estudamos a plasticidade cerebral adulta mediante o uso de técnicas de clarificación de tecido e microscopía light-sheet (3D). O uso de ferramentas computacionais avanzadas, coma o paquete ClearMap, é esencial para extraer información útil dos grandes volumes de información obtidos con estes métodos. Estes programas permiten a segmentación da información útil das imaxes (células de interese, por exemplo), a súa conversión en obxectos matemáticos (array de coordenadas, grafo…), e a súa transformación a un marco de coordenadas común (Allen Brain Atlas).
Traballos previos do laboratorio permitiron adaptar o módulo TubeMap de ClearMap para o mapeo da densidade axónica (proxeccións neuronais) a escala de cerebro completo, constituíndo unha ferramenta útil para a caracterización da conectividade. Porén, a ausencia de estratexias estatísticas específicas para a simplificación, análise e representación dos resultados biolóxicamente relevantes, limita a súa aplicación a gran escala.
O obxectivo principal do traballo é obter representacións cuantitativas das variables de interese que describen a plasticidade cerebral, e aplicar sobre elas metodoloxías estatísticas adecuadas que permitan:
•identificar patróns subxacentes,
•comparar distintas rexións cerebrais,
•e establecer diferenzas entre grupos experimentais.
Para isto, o estudante:
•implementará métodos de preprocesamento de datos e imaxes 3D orientados á redución da súa complexidade e custo computacional;
•desenvolverá procedementos para xerar representacións cuantitativas estruturadas;
•aplicará técnicas de estatística exploratoria, inferencial e multivariante para a análise comparativa das variables de interese.
|
